德國喺1938年11月9日晚上經歷「水晶之夜」，聽個名唔好以為呢件事好浪漫，其實佢係一次血腥嘅慘劇。

慘劇嘅起因要講返1938年10月尾，當時納粹德國政府將境內1.7萬名猶太人驅逐到波蘭，但起初波蘭政府拒絕收容佢哋，格林斯潘係其中一位受苦嘅猶太人，佢寄宿於一個法國巴黎嘅叔叔屋企。喺11月3日，格林斯潘收到親人所寄嘅明信片，入面敘述被驅逐時嘅可怕經歷。格林斯潘於是要求德國駐巴黎大使館秘書長馮·拉特幫手，但馮·拉特無幫到佢，好嬲嘅格林斯潘就喺11月7日向馮·拉特開咗3槍。無奈嘅係，身為納粹德國官員嘅馮·拉特，原來當時因為同情猶太人而需要接受調查。

馮·拉特最後喺11月9日逝世，成為納粹德國向猶太人發難嘅藉口。納粹德國唔單止停曬所有猶太報紙同雜誌出版，嗰晚仲展開進一步報復，慫恿德國各地嘅希特拉青年團、蓋世太保和黨衛軍扮成平民，瘋狂破壞猶太人嘅住宅、商店同猶太教堂，大約267間猶太教堂、超過7000間商店受損。由於好多窗被打碎，玻璃碎散滿一地，喺月光照射下好似水晶咁閃閃發光，所以個晚被稱為「水晶之夜」。一夜間，數以千計猶太人傷亡，幾萬人被捕，更悲慘嘅係，大屠殺亦因此揭開序幕。

圖片嚟自網絡。